Arrihet marrëveshja në Gjermani – Raportohet për një dakordësi në krijimin e qeverisë
Liderët politikë në Gjermani raportohet se kanë arritur më në fund një dakordësi në bisedimet e tyre për të formuar koalicionin e ri qeverisës, pas disa muajve të pasigurisë që erdhi prej votimit të Shtatorit.
Duke cituar burime brenda konservatorëve të Merkel, Reuters raportoi se të dyja palët kanë rënë dakord mbi një marrëveshje formale për koalicion. Megjithatë, burime të tjera nuk e konfirmojnë këtë rezultat, për shkak të mospërputhjeve në disa çështje.
Sipas të përditshmes gjermane, Bild, aleanca e Merkel do të marrë ministritë e Ekonomisë dhe të Mbrojtjes, ndërsa social demokratët, ministrinë e Financave.
Agjencia mediatike në Gjermani, DPA, raportoi gjithashtu se anëtari i SPD, Olaf Scholz, aktualisht kryebashkiaku i Hamburgut, pritet të marrë postin e ministrit të Financave.
Ministria e Jashtme thuhet gjithashtu se do të jetë nën kontrollin e SPD, me spekulimet se lideri i partisë Martin Schuzlz do të marrë rolin kryesor. Bisedimet mes dy partive dështuan të japin rezultat brenda afatit të vetëcaktuar që ishte dita e Diel.
Në veçanti, kujdesi shëndetësor dhe politikat mbi tregun e punës ishin dy çështjet ku ekzistonin mospërputhjet më të mëdha. Nëse konfirmohet, marrëveshja do të kërkojë miratimin nga 464 mijë anëtarët e partisë Social Demokrate, përpara se të bashkohet me aleancën e Merkel.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.