Shërbimet online, Rama: Në fund të marsit shmangen “doganierët” edhe për eksportet
Qeveria bën një bilanc të punës në katër muaj për shkurtimin e burokracive në administratë për qytetarët dhe sipërmarrjen.
Me kalimin e një sërë shërbimesh online bëhet e munduar që të ketë shpejtësi në marrjen e shërbimeve në sportele si dhe ul dhe korrupsionin.
Vetëm nga mos printimi i certifikatave në këtë periudhë u janë kursyer qytetarëve rreth 22 milionë lekë sipas të dhënave të qeverisë. Sipas kryeministrit Edi Rama modernizimi i shërbimeve ka një qëllim mbajtjen e duarve larg xhepave të qytetarëve dhe të bizneseve.
Sipas Ramës në fund të pranverës do të bëhet i mundur eliminimi i doganierit edhe për eksportet ashtu si është bërë për importet.
Për Ministrin e Ekonomisë dhe të Financave Arben Ahmetaj procesi i derregullimit ka bërë të mundur lehtësimin e procedurave për sipërmarrjen. Ndërkohë që në fund të marsit do të kalojnë online edhe dokumentet që i duhen një nënë për të siguruar lejen e barrëlindjes.
Procesi i derregullimit ka patur edhe efekte pozitive sa i përket klimës së biznesit në vend, sipas Ministres së Sipërmarrjes Sonila Qato.
Një rëndësi e veçantë në procesin e derregullimit i është kushtuar edhe platformës për bashkëqeverisjen me qytetarët. Rama ju ka bërë apel të gjithë qytetarëve që të denoncojnë çdo zyrtar që abuzon me postin e tij.
Në këtë periudhë ka patur rreth 2500 ankesa të cilat kanë marrë zgjidhje përmes portalit, ndërkohë që 35 punonjës të hipotekës janë në prokurori si rezultat i abuzimit.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.