Banka Europiane e Investimeve do të kontribuojë 5.2 miliardë euro për vendet jashtë BE-së: “Lehtësojmë qasjen në financa”
Banka Europiane e Investimeve ka marrë vendimin për kontribuar 5.2 miliardë euro në vendet jashtë BE-së për përballimin e krizës së COVID-19.
Ndihma financiare sipas BEI-së do të sigurojë qëndrueshmëri dhe do të amortizojë kostot e shkaktuara nga kriza:
“Ndihma e menjëhershme me procedurë të përshpejtuar do të ndihmojë në ruajtjen e vendeve të punës dhe mjeteve financiare të sektorëve më të kërcënuar nga ndikimi ekonomik dhe social prej koronavirusit, dhe do të pasohet nga financim shtesë afatgjatë në shëndetësi dhe biznes, sipas nevojës.” – shkruhet në deklaratën zyrtare.
Ndihma do të jetë e koordinuar edhe me instuticionet e tjera evropiane, në mënyrë që investimet të kthehen në prioritete strategjike në periudhën afatgjatë:
“Ne do të punojmë në partneritet të ngushtë me Komisionin Evropian, vendet anëtare të BE-së, institucionet evropiane financuese të zhvillimit dhe institucionet e tjera shumëpalëshe financiare për të siguruar qasje më të mirë në financa për partnerët publikë dhe privat, e cila është thelbësore për të përballuar tronditjen nga pandemia”, tha Werner Hoyer, President i Bankës Evropiane të Investimeve.
BEI-ja gjithashtu do të ofrojë asistencë teknike dhe ekspertizë sektoriale për të forcuar dhe rritur ndikimin e investimeve të reja. Fondi 5.2 miliardë euro do të ketë dy objektiva strategjikë që do të ndjekë:
- BEI-ja qëndron e gatshme të përshpejtojë rreth një miliardë euro disbursime për kreditë ekzistuese të miratuara, për të ndihmuar sektorin e shëndetësisë
- Reagimi i BEI-së do të mbështesë gjithashtu rritjen e qasjes në financa për ndërmarrjet e vogla dhe të mesme, përfshirë këtu përshkallëzimin e linjave ekzistuese të kredisë, të menaxhuara nga bankat vendore në të gjithë botën.
Gjithashtu BEI-ja do të punojë me partnerë të sektorit publik për të rritur financimin koncesionar të disponueshëm si për investimet në shëndetësi ashtu edhe për investimet në biznes. Kjo do të përfshijë mbështetje për shërbimet publike, përfshirë shëndetësinë, tregtinë rajonale dhe sektorët tepër të prekshëm si turizmi dhe mikpritja.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.