Basha: Mision i pamundur që ambasadorët të sjellin investitorë të huaj në Shqipëri!

Kreu i opozitës Lulzim Basha ka reaguar pas takimit të kryeministrit me ambasadorët ku u paralajmërua ridimensionimi i rolit të diplomacisë në ekonomi.

Për më shumë lexo: http://www.scan-tv.com/ridimensionimi-diplomacise-ekonomike-rama-fokusi-te-terheqja-e-investitoreve-te-huaj/

Sipas kreut të opozitës, në vend mbizotëron një klimë armiqësore ndaj biznesit vendas dhe të huaj. sipas tij, ambasadorët e kanë të pamundur që të sjellin investitorë të huaj sepse klima e biznesit është përkeqësuar, taksat janë rritur ndërsa korrupsioni është përhapur.

“Ambasadorët e kanë mision të pamundur sjelljen e investitorëve të huaj, sepse në 4 vitet e fundit raportet ndërkombëtare flasin vetëm për përkeqësimin e klimës së biznesit, për rritjen e taksave, për korrupsionin e përhapur në çdo nivel të qeverisjes. Sepse tenderat dhe koncesionet përfundojnë në xhepat e 10 klientëve të kryeministrit dhe investitorët e huaj gjymtohen nga kriminelët e lidhur me Ramën dhe Dakot e tij për t’u përzënë nga Shqipëria” shkruan Basha, sipas njoftimit të PD-së.

Në deklaratën e tij, Basha evidenton se niveli i investimeve do të ishte në minimum historik nëse nuk do të ishin dy projektet madhore, gazsjellësi TAP dhe Kaskada e Devollit.

“Gjatë qeverisjes tashmë të vdekur të Ramës, në Shqipëri nuk erdhi asnjë investim serioz i huaj. Po të mos ishin dy projektet e mëdha energjetike, gazsjellësi Trans Adriatik dhe Kaskada e Devollit, niveli i investimeve do të ishte në minimum historik, duke e kthyer vendin 15 vite prapa. Ambasadorët e Shqipërisë e kanë mision të pamundur sjelljen e investitorëve të huaj, sepse për shkak të keqqeverisjes së Ramës vendi është në depresion ekonomik dhe social. Rreth 300 mijë shqiptarë të larguar në 4 vjet nga Shqipëria janë prova ulëritëse e këtij realiteti dëshpërues. Investitorët e huaj do të vijnë në Shqipëri, kur vendi të ketë një qeveri që lufton krimin, hap vende pune dhe ju jep mundësi të gjithëve. Por kjo nuk do të ndodhë përsa kohë vendin ta drejtojë kryeministri i kapur nga krimi dhe i zhytur në krim, që ktheu Shqipërinë në hambar droge dhe buxhetin e shqiptarëve në lavatriçe për Pastrimin e Parave të Pista” deklaron Basha.

SCAN​

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.