Biden për vaksinën: Thjesht bëjeni! / Presidenti rikujton amerikanët se janë në rrezik nga variantet e reja

Presidenti i Shteteve të Bashkuara, Joe Biden, i bëri thirrje amerikanëve që të përfitojnë nga vaksinimi ndaj Covid-19, gjatë një udhëtimi në Karolinën e Veriut,  ndërkohë që norma e injeksioneve po ngadalësohet, pavarësisht përpjekjes kombëtare për të ndaluar përhapjen e varianteve të reja.  Vetëm 55% e popullsisë së rritur të shtetit ka marrë të paktën 1 dozë, pavarësisht incentivave, përfshirë një llotari prej 1 milionë dollarë, sipas Departamentit të Shëndetësisë në Karolinën e Veriut.   “Thjesht bëjeni” –  ishte mesazhi i Biden për ata që hezitojnë të marrin vaksinën apo dozën e dytë.

Shtëpia e Bardhë pranoi këtë Javë se mund të mos arrijë objektivin e vaksinimit të 70% të popullsisë së rritur deri më 4 Korrik, duke theksuar se ata në moshë 18-26 vjeç kanë qenë ngurrues për të marrë vaksinën. Visita e Biden erdhi ndërkohë që varianti më ngjitës Delta i virusit po përhapet në të gjithë botën dhe po kthehet në pengesën më të madhe në ndalimin e Covid brenda kufijve amerikanë. “Njerëzit e pavaksinuar janë shumë të cenuar”- tha Biden, duke i’u referuar variantit Delta.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.