Bie optimizmi në Eurozonë – Besimi në rënie, larg niveleve të 2017-ës

Besimi në ekonominë e Eurozonës ka vijuar të bjerë gjatë muajit Mars ndërkohë që rajoni po jep shenja se po hyn në një periudhë të një rritje ekonomike më të moderuar. Optimizmi në rajonin që ndan monedhën e përbashkët ka rënë në 5 ekonomitë kryesore, duke bërë që, indeksi i besimit në ekonomi të zbresë pranë nivelit më të ulët në 6 muaj.

Ky është muaji i tretë me radhë në rënie, duke u tërhequr kështu nga niveli rekord i 17 viteve të fundit që u prek në Dhjetor të 2017-ës. Të dhënat janë të fundit në serinë e atyre që sinjalizojnë se, rritja ekonomike në rajon është ftohur pas një bumi të ndjeshëm të vitit të kaluar, kur zgjerohej me hapin më të shpejtë në 1 dekadë.

Indeksi PMI tregon kështu se, aktiviteti i manifakturës dhe shërbimeve në Eurozonë është rritur me  hapin më të ngadaltë në 14 muaj, ndërkohë që besimi i investitorëve po bie si pasojë e shqetësimeve për një luftë tregtare. Pavarësisht kësaj, projeksionet flasin për një rritje ekonomike të rajonit në 2.4% këtë vit, nga 2.3% që ishte vitin e kaluar.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.