Biletat elektronike në transportin publik – Qeveria nxjerr udhëzimin për mënyrën e funksionimit
Transportit publik të udhëtarëve do t’i shtohet së shpejti edhe mundësia e pagesës elektronike. Udhëzimi i fundit i Këshillit të Ministrave përcakton llojet e kartave e biletave elektronike, si edhe biletat në format letër me çmim të printuar.
Biletimi i ri do të jetë funksional si në transportin urban, ashtu edhe në atë rrethqytetës, ndërqytetës dhe ndërkombëtar.
Blerja e një bilete në formatin elektronik do të bëhet e mundur falë kartave Smart/financiare bankare, e cila është një kartë plastike që përdor një sërë teknologjish për t’u lidhur me lexuesin përkatës, ose e cila mund të funksionojë pa kontakt me këto pajisje certifikuese e kontrolluese.
Këto karta do të ndahen në dy kategori: të personalizuara me të dhënat e mbajtësit dhe jo të personalizuara (pa fotografi, emër apo të dhënë tjetër personale).
Kartat e personalizuara do të mund t’i përfitojnë vetëm kategoritë e mëposhtme, për shkak të përfitimeve në marrjen e biletave me çmim të reduktuar ose falas:
- Invalidët e punës
- Të verbërit
- Jetimët
- Invalidët paraplegjik dhe tetraplegjik
- Studentët
- Çdo subjekt ose kategori që mund të përfitojë në vijim, mbështetur në legjislacionin në fuqi
Për përdorimin e këtyre kartave të personalizuara, e drejta duhet rinovuar çdo gjashtë muaj.
Për të ofruar një alternativë tjetër ndaj kartave smart, udhëzimi parashikon edhe përdorimin e biletave elektronike prej letre me shirit magnetik, të cilat do të jenë me 1 deri në 10 përdorime, sipas tarifës së udhëtimit.
Sistemi i ri i biletave të transportit publik do të ofrojnë edhe mundësinë të rinovohen apo rimbushen, ndërsa dizajni dhe modelimi për kartat smart dhe biletat elektronike prej letre do të bëhet nga Ministria e Transporteve ose nga njësitë vendore.
Sa i takon përdorimit të biletave elektronike apo biletave në formë letre me çmim të parashtypur, Ministria e Transportit do t’ia lërë në dorë qeverisjes vendore nëse duan t’i aplikojnë brenda jurisduksionit të tyre.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.