Çmimet e konsumit në SHBA pësojnë rritjen më të shpejtë që nga viti 1982!
Rritjet e çmimeve në SHBA u përshpejtuan me më shumë se sa pritej muajin e kaluar, duke e shtyrë inflacionin vjetor në 7.5% – norma më e lartë që nga viti 1982. Kostot e ushqimit dhe energjisë ndihmuan në nxitjen e rritjeve, gjë që la të paprekura disa kategori shpenzimesh.
Rritja e çmimeve po shtrëngon financat e familjeve pasi pagat nuk arrijnë të mbajnë ritmin. Uashingtoni është nën presion për të adresuar çështjen, me bankën qendrore të SHBA-së që pritet të rrisë normat e interesit.
Në SHBA, shpenzimet konsumatore qëndruan të forta për pjesën më të madhe të vitit të kaluar, pavarësisht rritjes së shpejtë të çmimeve, të cilat analistët thonë se janë shkaktuar nga një përzierje e kërkesës së fuqishme, shpenzimeve qeveritare, pengesave të zinxhirit të furnizimit dhe rritjes së pagave pas mungesës së fuqisë punëtore.
Amazon, Netflix dhe Procter & Gamble janë ndër firmat e shumta që kanë njoftuar rritje të çmimeve muajt e fundit, duke përmendur kostot më të larta. Ata kanë thënë se presin që shumica e familjeve të absorbojnë rritjet. Por çështja është gjithnjë e më shumë një çështje kyçe për votuesit, duke dëmtuar popullaritetin e Presidentit Joe Biden pavarësisht rritjes së fortë ekonomike vitin e kaluar.
Në bazë mujore, çmimet e konsumit u rritën me 0.6% në janar, tha Departamenti i Punës i SHBA. Indeksi i qirasë u rrit me 0.4%, ndërsa çmimet e ushqimeve u rritën me 1%, nxitur nga rritja e kostos së produkteve të bukës dhe drithërave. Biden tha se administrata e tij po bënte investime për të lehtësuar pengesat e zinxhirit të furnizimit dhe kishte mbrojtur politika të tjera që synonin uljen e çmimeve me rritjen e konkurrencës.
Çmimet për dhomat e hoteleve ranë gjithashtu me 3.9%, gjë që mund të jetë nxitur nga ndikimi i uljes së udhëtimeve për shkak të Omicron. Por duke pasur parasysh rritjen e kostove të ushqimit dhe strehimit, presionet financiare për shumicën e familjeve nuk po largohen. BBC
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.