Çmimi i energjisë për familjet s’ndryshon – Vendimi i ERE, deri në fund të vitit. Rritja përmes fashave shqyrtohet nëse aplikon FSHU

Çmimi i energjisë për konsumatorët familjarë nuk do të ndryshojë, pavarësisht rritjes së tarifës së shpërndarjes.

Bordi i Entit Rregullator i Energjisë miratoi rritjen e tarifës së shpërndarjes së energjisë elektrike nga 4.79 lekë/kwh që ishte deri më tani, në 6.42 lekë/kwh për klientët e lidhur në tensionin 0.4 KV, ku ndër të tjera bëjnë pjesë abonentët familjarë.

Megjithatë, ndonëse kjo tarifë impakton çmimin final të energjisë,  ERE  vendosi që deri në fund të këtij viti të lerë në fuqi çmimet aktuale të shitjes me pakicë të energjisë elektrike, çka do të thotë se kostot do të përballohen nga Furnizuesi i Shërbimit Universal, teksa do të jetë Operatori i Sistemit të Shpërndarjes që do të realizojë më shumë të ardhura.

Vendimi i ERE-s vjen në një kohë që kryeministri Edi Rama ka paralajmëruar se do të kërkojë rikthimin e faturimit me fasha të energjisë elektrike, me qëllim rritjen e çmimit për një kategori familjarësh, të cilësuar si të pasur.

Megjithatë, referuar  procedurave ligjore Furnizuesi i Shërbimit Universal mund të bëjë aplikim të ri pranë Entit Rregullator të Energjisë, por do të jetë ky i fundit që do të marrë vendimin final në këtë drejtim.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.