Çmimi i vaksinës 90% efektive, BioNTech: “Poshtë normave tipike të tregut. Do të ndryshojë mes rajoneve”

BioNTech, kompania e parë që ofron prova të një vaksine funksionale të Covid-19, po planifikon të vendosë një çmim poshtë “normave tipike të tregut” për regjimin me 2 injeksione, dhe çmimi do të ndryshojë mes vendeve dhe rajoneve.

Kreu i strategjisë së firmës gjermane të bio-teknologjisë, Ryan Richardson, tha se çmimi i vaksinës, që po zhvillohet së bashku me gjigantin amerikan Pfizer, dhe që nuk ka marrë ende miratim rregullator, do të reflektojë rreziqet financiare që investitorët e sektorit privat të kompanisë kanë pranuar.

“Jemi përpjekur të ndjekim një qasje të balancuar që pranon se inovacioni kërkon kapital dhe investime, e për rrjedhojë planifikojmë ta çmojmë vaksinën poshtë normave tipike të tregut, duke reflektuar situatën ku ndodhemi dhe objektivin për akses në të gjithë botën”, – tha ai. Richardson shton se pritet të ketë çmime të ndryshme në rajone të caktuara të botës, pa ofruar detaje për vendet specifike apo për çmimin.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.