ERRU: Bashkim gradual i ujësjellësve – “Të zgjidhen 2-3 kompani pilot, agregimi i menjëhershëm rrit ndjeshëm tarifat për qytetarët”

Enti Rregullator i Ujit propozon agregimin gradual të shoqërive të ujësjellës-kanalizimeve, si alternativën më të mirë për përmirësimin e situatës së sektorit. Një ditë pas zbardhjes të projektvendimit të qeverisë, që parashikonon bashkimin e ujësjellësve, TV SCAN risjell në vëmendje analizën e ERRU-së, të publikuar para disa muajsh ku propozohej përzgjedhja e 2-3 ujësjellësve pilot, që do të mund të bashkohen në baza vullnetare.

E njëjta analizë kërkonte që këto kompani pilot të mbështetshin me incentiva nga pushteti qendror, sikurse e kërkon edhe legjislacioni në fuqi, ndonëse projektvendimi i siguruar nga TV SCAN parashikon kalimin e 51% të aksioneve pranë Ministrië së Infrastrukturës dhe Energjisë. Sipas ERRU-së, çdo agregim pilot do të duhet të shërbejë si shembull ose referencë suksesi për planifikimin dhe zbatimin e strategjisë në vite për të gjithë sektorin. Paralelisht, Enti Rregullator i Ujit ka analizuar dhe mundësinë e agregimit të menjehërshëm të të gjithë shoqërive që operojnë aktualisht, në 3-4 shoqëri të mëdha, duke theksuar se kjo do të sillte një sërë problematikash.

Një prej tyre lidhet me sistemin e tarifimit, duke qenë se aktualisht çdo shoqëri UK aplikon tarifat e veta specifike për çdo kategori konsumatorësh në zonën e saj të shërbimit. Aktualisht në vendin tonë janë në fuqi rreth 57 sisteme tarifash shërbimi UK që duhet të unifikohen. Ndërkohë që, vlera mesatare e faturës mujore në të 57 shoqëritë luhatet nga 350 deri në 2000 lekë/muaj. Për mbulimin e kostove të operimit dhe mirëmbajtjes aktuale në sektor duhet të aplikohet një faturë e unifikuar për sektorin në vlerën prej rreth 1400 lekë/muaj.

Sipas ERRU-së, vlera relativisht e lartë e faturës se unifikuar do të krijonte probleme sociale për bashkitë në të cilat aktualisht aplikohen tarifa mjaft të ulta, sidomos për zonën verilindore, ku procesit duhet t’i paraprihet me një politikë subvencionimi të tarifave. Sipas relacionit që shoqëron projektvendimin e qeverisë, reformë vjen për shkak të performancës së dobët komerciale e kombinuar me nivele të larta të ujit pa të ardhura, që arrin në masën 65.5%, ndërsa humbjet financiare dhe borxhet e kompanive janë të larta.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.