Është gjallë apo ka ndërruar jetë? Çfarë dihet për Kim Jong Un dhe shëndetin e tij

Spekulime u bënë të shtunën mbi shëndetin e liderit të Koresë së Veriut Kim Jong Un pasi ai nuk është parë në publik që nga 11 prilli, kur kryesoi një takim partie.

Spekulimet janë nxitur nga raporte që citojnë burime në Kinë dhe Japoni se Kim, i cili besohet të jetë 36 vjeç, është në gjendje të rëndë pas një operacioni kardiovaskular, ose madje mund edhe të ketë ndërruar jetë.

Saktësia e këtyre raporteve është e paqartë. Qeveria e Koresë së Jugut, e cila monitoron nga afër Korenë e Veriut, minimizoi thashethemet më 21 prill dhe tha se Kim duket se ende po drejton vendin.

Zyrtarët kinezë gjithashtu kanë minimizuar thashethemet se Kim është sëmurë. Inteligjenca amerikane raportohet se po monitoron situatën, por Presidenti Trump tha në fillim të kësaj jave se SHBA nuk ka asnjë informacion të besueshëm në lidhje me shëndetin e Kim.

Spekulimet për shëndetin e Kim filluan së pari në 15 prill, kur ai nuk u paraqit në një festë që përkujtonte lindjen e Kim Il Sung, gjyshit të tij dhe themeluesit të Koresë së Veriut. Ditëlindja është festa më e rëndësishme e vendit.

Pastaj, spekulimet u intensifikuan kur një agjenci lajmesh nga Korea e Jugut publikoi një histori që raportonte se udhëheqësi i Koresë së Veriut i ishte nënshtruar një operacioni në zemër dhe po shërohej në një vilë jashtë Pyongyang, kryeqytetit të vendit. Raporti mbështetej në një burim të vetëm pa emër brenda Koresë së Veriut.

Mediat në Korenë e Veriut, përfshirë Agjencinë Qendrore Koreane të Lajmeve, të drejtuar nga shteti, kanë heshtur deri tani për mungesën e Kim në ngjarjet publike.

Vëzhguesit e Koresë së Veriut thonë se një nga faktorët më të mëdhenj të rrezikut të Kim ishte shëndeti i tij i dobët, veçanërisht rreziqet nga problemet kardiake për shkak të peshës së tij.

D.B – SCAN
Burimi: Business Insider

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.