Fed: Rritja e normave të interesit ‘së shpejti do të jetë e përshtatshme’!

Rezerva Federale nuk i rriti normat e interesit të mërkurën, por tha se një lëvizje e tillë “së shpejti do të jetë e përshtatshme”. Banka është nën presion për të frenuar inflacionin pasi çmimet në SHBA rriten me ritmin më të shpejtë në pothuajse 40 vjet.

Analistët presin një rritje të normës në mars, e cila do të ishte e para që nga viti 2018. Në një konferencë shtypi pas takimit të së mërkurës të zyrtarëve të Fed, kryetari i Rezervës Federale, Jerome Powell nuk tha se sa shpejt ose sa të larta do të rriteshin normat e interesit në SHBA.

Por Powell tha se zyrtarët ishin “të një mendje” për të rritur normën bazë të bankës në mars, duke shtuar se ai ishte i bindur se banka mund të ndërmarrë veprime pa dëmtuar rimëkëmbjen. Ai sugjeroi gjithashtu se zyrtarët janë të gatshëm të lëvizin më shpejt se sa herën e fundit që Fed po rriti normat, duke vënë në dukje se ekonomia është “shumë më e fortë” se sa ishte në 2015 – siç është inflacioni.

Kostot më të larta të huamarrjes ndihmojnë në luftimin e rritjes së çmimeve duke reduktuar kërkesën për artikuj të tillë si makinat dhe shtëpitë – nxitësit kryesorë të inflacionit në SHBA, i cili ka vazhduar shumë më gjatë nga sa prisnin fillimisht zyrtarët e Fed.

Por Fed rrezikon të ftohë aktivitetin ekonomik më shumë se sa ishte menduar. Investitorët në bursë janë gjithashtu të shqetësuar se si çmimet e aksioneve do t’i përgjigjen lëvizjeve të Fed, pasi normat e larta të interesit i bëjnë investimet e tjera më tërheqëse.

Tregjet e shqetësuara në SHBA kanë parë tre javë radhazi rënie. Tre indekset kryesore të aksioneve të SHBA-së zvogëluan fitimet gjatë komenteve të Powell. Beth Ann Bovino, kryeekonomistja amerikane në S&P Global Ratings tha se deklarata e Fed konfirmoi se banka do të rrisë normat e interesit në mars. BBC

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.