“Fitch” paralajmëron Italinë – “Reformat në rrezik si pasojë e mungesës së qeverisë”

Gjigandi i vlerësimit, “Fitch” ka ruajtur të pandryshuar, në `BBB` me perspektivë të qëndrueshme notën për borxhin sovran të Italisë.

Por, pavarësisht kësaj, ka paralajmëruar se, reformat në vend janë në rrezik për shkak të vështirësisë së qeverisjes së vendit.

Sa i përket uljes së borxhit publik, “Fitch” nënvizon se, do të jetë minimale përgjatë këtij viti dhe atij të ardhshëm. Vendimi i “Fitch” vjen në kulmin debatit politik në vend dhe negociatave mes partive kryesore për të formuar një qeveri në gjendje të çojë vendin përpara.

“Fitch” ndërkohë nënvizon edhe rëndësinë që ka rritja e partive populiste në vend, duke marrë shtysë edhe nga retorika anti-euro.

Agjencia tjetër e vlerësimit, “Moody`s”, e cila duhet të nxirrte të Premten një vendim për vendin, e ka shtyrë këtë, si pasojë e paqartësive që rrethojnë ekonominë e tretë më të madhe të Eurozonës.

Pak përpara zgjedhjeve, “Moody`s” theksonte se, problemi numër një për vendin aktualisht është borxhi mjaft i lartë publik, që kërcënon më shumë edhe se destabiliteti politik.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.