“Ftillohu! Evito cash. Paguaj me kartë! Shqipëria 100 herë më pak transaksione për frymë se Europa nëpër terminalet POS
Nga ‘SCAN INTELLIGENCE UNIT’
Së fundmi, Shoqata Shqiptare e Bankave (aab) ka nisur një fushatë të re, nën moton “Ftillohu! Evito cash. Paguaj me kartë! Fushata që ka për qëllim ndërgjegjësimin e popullatës për të hequr dorë nga cash-i, pra paraja fizike, dhe për t`u orientuar më shumë drejt metodave alternative të pagesës, pa para fizike, do të zgjasë 2 muaj. Spiro Brumbulli, sekretari i përgjithshëm i shoqatës shqiptare të bankave (aab) përmendi disa statistika në lidhje me përhapjen e këtyre metodave alternative të pagesës në vendin tonë. Sipas tij, por edhe sipas të dhënave të Bankës së Shqipërisë, rezulton se, në 2019-ën, në vendin tonë u kryen rreth 5 milionë transaksione nëpër pikat POS, pra pikat e pagesave me kartë nëpër sipërmarrje tregtare apo shërbimi. Nga përpunimi i të dhënave nga “Scan Intelligence Unit”, rezulton se këtë vit ka një rritje të lehtë të përdorimit. Me një projeksion të thjeshtë, nëse edhe gjatë muajve të mbetur të vitit do të vazhdojë e njëjta ecuri me muajt e kaluar, atëherë këtë vit do të kemi rreth 5.5 mln transaksione nëpër pikat POS në vend. Rritja e lehtë duket se është rrjedhojë e pandemisë, dhe tendencës në rritje për të shmangur përdorimin e parasë fizike.
Duke i`u referuar të dhënave zyrtare, ato të vitit 2019, me 5 mln transaksione në vit, atëherë rezulton se për frymë, mesatarisht, një shqiptar e përdor më pak se dy herë në vit këtë metodë pagese, konkretisht vetëm 1.75 herë. Shifra është tejet e ulët po të kemi parasysh se nuk kemi të bëjmë me një metodë inovative në tregun shqiptar dhe sidomos atë botëror, por për një metodë të hershme. Por sa është kjo shifër në vendet tjera të Europës. Mesatarja e Bashkimit Europian fiksohet në 168.3 pagesa për frymë në vit për 2019-ën, pra thuajse 100 herë më e lartë se në vendin tone, tregojnë të dhënat zyrtare të Bankës Qendrore Europiane, të përpunuara nga “Scan Intelligence Unit” për numër popullsie.
Në vitin 2000 në Bashkimin Europian, kjo mesatare fiksohej në 32.7 transaksione për frymë në vit. Pra, edhe para 20 vitesh, në Europë metoda e pagesës jo cash ishte ndjeshëm më e përhapur se në shqipërinë e sotme. Për vende të tjera të Bashkimit europian, si luksemburgu, norma ngjitet në 857 transaksione për frymë në vit, pra më shumë se dy herë në ditë për çdo qytetar.
Pagesat pa para fizike, vlerësohen gjerësisht nga ekspertët si një metodë më e sigurtë pagese për individët por edhe për bankat, ndërkohë që nga ana tjetër ulin edhe kostot.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.