Gazi Europian, në nivele komode – Çmimet shumë të larta dhe dekurajimi i konsumit mbajnë magazinimin brenda pritshmërive

Gjendja  e Gazit në Europë e ka kaluar dimrin pak poshtë nivelit normal, por më mirë sesa pritej 3 muaj më parë, falë motit të butë dhe çmimeve shumë të larta që kanë maksimizuar importet dhe dekurajuar konsumin.

Vendet e magazinimit në të gjithë Bashkimin Europian dhe në Mbretërinë e Bashkuar mbanin rreth 294 Terawatt-orë gaz në fillim të prillit, sipas vlerësimeve paraprake nga Infrastuktura e Gazit në Europë.

Inventarët e gazit ishin 61 Terawatt-orë  TWh  ose rreth 0.54 devijime standarde nën mesataren e mëparshme 10-vjeçare për të njëjtën kohë të vitit.

Megjithatë, situata është përmirësuar ndjeshëm që nga Krishtëlindjet, kur stoqet pritej të binin në 215 Terawatt-orë deri më 1 prill, që do të shënontë 1.22 devijime standarde nën mesataren.

Temperaturat kanë qenë më të ngrohta se normalja, veçanërisht që nga fillimi i vitit, gjë që ka frenuar konsumin e gazit dhe ka ulur presionin mbi stoqet.

Gjithashtu, çmimet rekord në Europë kanë inkurajuar furnizuesit e gazit të Lëngshëm Natyror të mos eksportojnë në Azi, ndërkohë çmimet e larta kanë reduktuar gjithashtu konsumin nga gjeneruesit e energjisë.

Shkarkimi total i inventarëve nga niveli më i lartë pas verës i vitit të kaluar në nivelin më të ulët pas dimrit të këtij viti ishte 578 Terrawat-orë (TWh) nën mesataren për pesë vitet e fundit.

Vëmendja e tregut tani është kthyer në rimbushjen e magazinimit dhe akumulimin e rezervave përpara dimrit të ardhshëm.

Nëse inventarët grumbullohen në përputhje me mesataren e 10 viteve të fundit, ato pritet të arrijnë në 871 TWh në fillim të tetorit.

Në praktikë, çmimet shumë të larta të gazit do të vazhdojnë të inkurajojnë importet në nivelet maksimale dhe të ulin konsumin, ç’ka do të sillte rimbushjen e magazanivae më shpejt se zakonisht.

Blerta Lata / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.