‘Gorliwood’ mbështet kandidatin e CDU, kundërshton AfD-në e ekstremit të djathtë
Qyteti gjerman i Gorlitz, i njohur me emrin “Gorliwood” për shkak të dhjetëra filmave të realizuar atje, mbështeti partinë e kancelares Angela Merkel të dielën, duke zgjedhur kandidatin e CDU-së Oktavian Ursu si kryebashkiak dhe duke refuzuar kandidatin e Afd-së Sebastian Wippel. Wippel do të kishte qenë kryebashkiaku i parë i vendit nga opsioni i ekstremit të djathtë Alternativa për Gjermaninë (AfD). Ai fitoi raundin e parë të zgjedhjeve më 26 maj me 36% të votave, por nuk arriti të mposhtte kandidatin e CDU në raundin e dytë. Ursu fitoi balotazhin me pak më shumë se 55% pasi partitë e tjera e mbështetën atë.
“Nuk ishte një votë për Z. Ursu, por më shumë një votë kundër kandidatit AfD, pra kundër meje“, tha Wippel. “CDU duhej të kishte pasur mbështetjen nga shumë grupe, përfshirë edhe ekstremistët e majtë, pa të cilët ata nuk do të kishin triumfuar dot”. “Jam i lumtur që një shumicë ka zgjedhur të votojë për mua, por në fund nuk ka të bëjë me dy kandidatë, por me orientimin e këtij qyteti me botën e jashtme dhe me faktin që të mbetemi një shoqëri e hapur dhe mos të izolohemi,” tha Ursu.
Partia e ekstremit të djathtë dhe anti-emigrante AfD, ka ‘shkundur’ disi politikën gjermane vitet e fundit, duke hyrë në çdo legjislaturë shtetërore, në parlamentin federal dhe në Parlamentin Europian. Një fitore në Gorlitz mund të kishte forcuar pozicionin e partisë si një parti serioze dhe të vepronte si një tregues i zgjedhjeve rajonale në Saksoni.
Burimi: Euronews
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.