Importe rekord të bakrit në Kinë, rritje me 25% në Mars. T1 më i lartë që prej 2008, ndikon kërkesa e fortë

Importet e bakrit në Kinë u rritën me 25% në muajin Mars, për shkak të rritjes së kërkesës për metalin dhe prej zgjidhjes së disa çështjeve të logjistikës. Mbërritjet e bakrit të papërpunuar dhe produkteve të bakrit arritën në një total prej 552,317 ton në muajin e kaluar, sipas Administratës së Doganave.  Kjo shifër ishte në rritje nga 441.9 mijë ton në Mars 2020, kur ekonomia nisi të rimëkëmbej nga pandemia dhe në rritje me 34.7% nga niveli rekord i ulët në Shkurt.

Kina është ende konsumatori më i madh i bakrit. Manifaktura u rrit me një normë më të madhe se ç’pritej në Mars, ndërsa aktiviteti i sektorit të ndërtimit, që përdor ndjeshëm bakrin, u rrit gjithashtu prej temperaturave më të ngrohta.  Importet e bakrit për tremujorin e parë arritën në një total prej 1.44 milionë ton, në rritje me 11.9% me bazë vjetore dhe njëkohësisht tremujori i parë më i lartë që prej vitit 2008.  Analistët thonë se kërkesa në kinë është rritur për shkak se vendet e tjera nuk janë rimëkëmbur mirë nga pandemia, duke bërë që një pjesë e porosive të zhvendoset drejt Kinës.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.