Investimi në Parkun Olimpik, Veliaj: Punimet drejt fundit, çelja e tij në muajin Maj

Ish-kompleksi sportiv “Dinamo” është shndërruar në një hapësirë moderne sportive, e cila bën bashkë të gjitha strukturat zinxhir të sportit, federatat, peshëngritjen, mundjen, atletikën, si dhe lojërat me dorë. Punimet për ngritjen e strukturës kanë përfunduar, dhe pritet që brenda muajit Maj, Parku Olimpik i Tiranës të hapë dyert për sportistët më elitarë të vendit.

Kryebashkiaku Erion Veliaj inspektoi ecurinë e punimeve, duke vënë theksin në rëndësinë e këtij investimi. Veliaj bëri me dije edhe vendimin për të nisur investimin për Kopshtin Zoologjik, i cili do të pësojë një ndryshim rrënjësor, për t’u kthyer në një nga pikat më tërheqëse të kryeqytetit.

Kompleksi olimpik është konceptuar në dy godina gjigante dhe moderne, ku përfshihen të gjitha federatat olimpike, palestrat përkatëse për stërvitje dhe salla e madhe e lojërave me dorë, ku do të organizohen eventet kombëtare të basketbollit dhe volejbollit.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.