Ish të dënuarit politikë, procedura e përfitimit për kategorinë parësore. Kërkesa që duhet plotësuar dhe afati i dorëzimit në MD

Publikohet procedura për përfshirjen në skemën e përfitimit të dëmshpërblimit, për ish të dënuarit politikë, të cilët bëjnë pjesë në kategorinë e subjekteve përfituese parësore. Konkretisht, së fundmi janë publikuar ndryshimet në ligjin nr. 9831, datë 12.11.2007, “Për dëmshpërblimin e ish-të dënuarve politikë të regjimit komunist”, të ndryshuar, ku përcaktohen kriteret e përfitimit, si dhe veprimet që duhen ndjekur për t’u trajtuar me dëmshpërblim.

“Brenda datës 31.12.2017, ish-të dënuarit politikë, të cilët bëjnë pjesë në kategorinë e subjekteve përfituese parësore dhe plotësojnë kriteret e neneve 4 e 5, të ligjit, drejtpërdrejt apo nëpërmjet kujdestarit ligjor, paraqesin në Ministrinë e Drejtësisë kërkesën, me shkrim, për përfitimin e dëmshpërblimit financiar për dënimin penal të padrejtë, sipas formularit që i bashkëlidhet këtij ligji”.

Sipas ndryshimeve ligjore, mosparaqitja e formularit brenda afatit të përcaktuar në ligj sjell s’kualifikim nga përfitimi

“Mosparaqitja e kërkesës brenda afatit të përcaktuar sjell humbjen e së drejtës së dëmshpërblimit për ish-të dënuarin politik, i cili bën pjesë në kategorinë e subjekteve përfituese parësore. Sipas këtij ligji, ish-i dënuari politik i regjimit komunist, që bën pjesë në kategorinë parësore, personi i autorizuar apo kujdestari i tij ligjor nuk mund të rivendosen në afat për paraqitjen e kërkesës pas datës 31.12.2017.”, thuhet në ndryshimet ligjore.

Ministria e Drejtësisë fillon procedurën e shqyrtimit administrativ për kërkesat për përfitimin e dëmshpërblimit financiar, të paraqitura nga subjektet e kategorisë parësore, pas datës 1.7.2009. Në përfundim thuhet se ky ligj hyn në fuqi 15 ditë pas botimit në Fletoren Zyrtare.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.