Italia me sytë nga turizmi mjekësor – Të ardhurat nga ky sektor arrijnë shifrën 2 mld euro
Pas ushqimit, kulturës, modës dhe dizajnit, shëndeti është një tjetër kandidat për t’u bërë një nga tiparet dalluese të Made in Italy. Qëllimi është që Italia të bëhet një ndër destinacionet kryesore të turizmit mjekësor.
Turizmi mjekësor është një fenomen kompleks social dhe ekonomik që ka një vlerë globale të vlerësuar prej mbi 100 miliardë dollarë në vit. Rreth 10 milionë pacientë udhëtojnë brenda ose jashtë vendit për të kërkuar trajtim mjekësor.
Një studim i Komisionit Europian për Transport dhe Turizëm u përqendrua në turizmin mjekësor të BE-së. Në mesin e 28 shteteve të Bashkimit Europian, u regjistruan 56 milionë njerëz nga vendet anëtare dhe më shumë se 5 milionë ndërkombëtarë. Nga këto, 4.3% lidheshin me shkaqe shëndetësore (pothuajse 6% e të ardhurve dhe pak më shumë se 1% të ndërkombëtarëve), me një vlerë të përgjithshme prej 47 miliardë euro. Kjo përfaqëson 4.6% të qarkullimit të të gjithë sektorit të turizmit në BE.
Udhëtimet hyrëse të njerëzve nga vendet jo anëtare të BE-së për arsye shëndetësore janë më të larta, duke arritur në 6% të totalit. Kostoja e ulët e udhëtimit ajror ka përmirësuar ndjeshëm aksesin në industrinë e kujdesit shëndetësor dhe atë të turizmit mjekësor. Kjo, veçanërisht për pacientët që vijnë nga vende me sisteme të dobëta shëndetësore ose lista të gjata pritjesh. Ky faktor, së bashku me të tjerë po nxit rritjen e sektorit.
Sipas vlerësimeve, Italia gjeneron të ardhura me vlerë prej 2 miliardë euro falë turizmit mjekësor. Tani për tani, bilanci paraqitet negativ. Ka rreth 200 mijë italianë që shkojnë jashtë vendit për trajtim, kryesisht për trajtim dentar, estetik dhe flokësh.
Nga ana tjetër, vetëm në Itali, kryesisht nga vendet arabe, Rusia, Zvicra dhe Ballkani morën trajtimin mjekësor 5 mijë të huaj. Ato kryesisht udhëhiqen nga trajtime shumë të specializuara në neurologji, kardiologji, onkologji dhe ortopedi. Kjo reflektohet në shpenzimet mesatare prej 20 deri në 70 mijë euro. Edhe pse është ende larg nga 1.2 milionë pacientët e pranuar në Tajlandë ose 1 milionë në Meksikë, vendi po lëviz në drejtimin e duhur.
“Kemi krijuar një tavolinë pune me Ministrinë e Turizmit dhe ato të Punëve të Jashtme dhe Shëndetësisë për të identifikuar kompanitë private të përsosmërisë dhe për të rritur segmentin e turizmit mjekësor. Kjo do të hapë tregje dhe do të sjellë burime në sistemin tonë shëndetësor në një fushë që duhet të rritet, “ tha Dorina Bianchi, një përfaqësuese politike.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.