Kancelari Scholz flet për varësinë energjitike – “Perëndimi duhet të punojë shumë që të sigurojë burime përtej Rusisë”
Kancelari gjerman, Olaf Scholz, tha se Perëndimi duhet të punojë shumë që të gjejë një burim alternativ të energjisë përtej Rusisë, ndërkohë që bisedimet e sanksioneve po marrin vrull. Scholz theksoi gjatë Konferencës Vjetore të Sigurisë në Mynih, se pjesa më e madhe e perëndimit varet nga Rusia për furnizimet me energji. “Ka shumë eksporte të naftës, qymyrit dhe gazit nga Rusia drejt shumë vendeve, dhe një sasi e madhe e eksporteve të naftës drejt SHBA”- tha Scholz.
Sipas tij, duhet punuar fort që të krijohet një situatë ku ka alternativa. Rusa ishte furnitori më i madh i gazit natyror dhe naftës tek Bashkimi Europian në vitin e kaluar. Kjo vjen pas bisedimeve nga perëndimi në javët e fundit mbi sanksionimin e Rusisë , në veçanti industrinë energjitike, nëse sulmon ukrainën. Rusia ka mohuar vazhdimisht planin për të sulmuar vendin fqinj, pavarësisht se ka mbledhur mbi 150,000 trupa pranë kufirit. Ka patur gjithashtu raportime të disa predhave në linjat e armëpushimit në rajonin Donbass si nga burimet ruse edhe nga Ukraina në javën që kaloi.
Në fundjavë, gjatë një pjese të stërvitjes ushtarake të planifikuar,Rusia lëshoi predha ballistike, duke treguar gatishmërinë bërthamore. Presidentja e komisionit Europian, Ursula von der Leyen, tha se po diskutohen sanksionet energjitike kundër gjigantit rus të gazit Gazprom, nëse ndodh sulmi. Megjithatë, sanksione të tjera do të kenë pasoja financiare edhe për Ukrainën, pasi disa tubacione të Rusisë kalojnë përmes vendit.
Scholz nuk është i vetmi që po diskuton për nevojën e uljes së varësisë nga Rusia për energjinë. Më herët gjatë fundjavës, von der Leyen dhe sekretari i Përgjithshëm i NATOS, Jens Stoltenberg, thanë se një veprim i tillë është i rëndësishëm.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.