Kim Jong-un bën “mea culpa” / Pranon se ka dështuar në politikat ekonomike që ka ndërmarrë

Diktatori i Koresë së Veriut, Kim Jong-un, ka pranuar se politikat e tij ekonomike kanë dështuar dhe u zotua të shmangte përsëritjen e “mësimeve të dhimbshme” të së kaluarës në një takim të rrallë të partisë qeverisëse të vendit.

Kim i tha kongresit të Partisë së Punëtorëve se plani i tij ekonomik pesë-vjeçar nuk kishte arritur qëllimet e tij “në pothuajse të gjitha fushat në një masë të madhe”, thanë të mërkurën media shtetërore e Koresë së Veriut.

“Ne duhet të promovojmë dhe zgjerojmë më tej sukseset dhe fitoret që kemi arritur me përpjekjet tona, por duhet të parandalojmë mësimet e dhimbshme.”

Kongresi, i pari për pesë vjet, u hap me Kim përballë sfidave më të vështira të qeverisjes së tij nëntë vjeçare, të shkaktuara nga ato që ai i quajti kriza “të papara”.

Ky takim po vëzhgohet nga afër për shenja të një ndryshimi në politikën ekonomike, pas një viti në të cilin Koreja e Veriut u godit nga katastrofat natyrore ndërsa po luftonte me efektet goditëse të pandemisë koronavirus dhe sanksioneve ndërkombëtare të vendosura në përgjigje të raketës së saj bërthamore dhe balistike.

Ndërsa regjimi vazhdon të pretendojë se nuk ka regjistruar një rast të vetëm të Covid-19, mbylljet e kufijve dhe pezullimi i fluturimeve ndërkombëtare kanë tensionuar një ekonomi tashmë të brishtë.

Tregtia me Kinën ra me gati 80% në 11 muajt e parë të vitit 2020 krahasuar me të njëjtën periudhë në 2019, sipas Song Jaeguk, një analist në Institutin e Kërkimit Ekonomik IBK në Seul. GDP e Koresë së Veriut vlerësohej të ishte tkurrur me 9.3% në vitin 2020, shtoi ai.

Takimi, i cili filloi të Martën por nuk u përmend në raportet zyrtare deri të Mërkurën, do të zgjasë disa ditë. Kim pritet të njoftojë emërime të larta që mund të përfshijnë gradime të mëtejshme për motrën e tij, Kim Yo-jong, e cila shihet gjerësisht si e dyta de facto në komandën e regjimit.

Dosti Banushi – SCAN
Burimi: The Guardian

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.