Krimi shqiptar pushton Britaninë – Shqiptarët bëhen të burgosurit numër një mes të huajve, dyfishohen në 4 vite
Shqiptarët kanë thyer një rekord të ri, duke u bërë për herë të parë, popullsia më e madhe jo britanike në burgjet e ishullit. Kështu, sipas asaj që shkruan “The Sun”, duke i`u referuar një raporti të Ministrisë së Drejtësisë britanike, në burgjet britanike aktualisht ka rreth 876 shtetas shqiptarë që vuajnë dënimin, nga 9089 të burgosur të huaj gjithsej në të gjithë vendin. Kjo do të thotë se, shqiptarët janë të parët jo-britanikë nëpër burgje, duke zënë 10% të totalit. Pra, 1 në 10 të burgosur të huaj në Britaninë e Madhe është shqiptar.
Më pas ndjekin polakët, rumunët dhe irlandezët, me nga 8%. Për të ilustruar më mirë shqetësimin e madh që ka zënë britanikët, si autoritetet shtetërore ashtu edhe opinionin publik, mjafton të themi se 4 vite më parë, në 2015-ën, numri i shqiptarëve në brigjet britanike ishte sa gjysma e shifrës së sotme, në 475 të burgosur.
Dhjetë vite më parë ndërkohë, ishte vetëm 166. Sipas asaj që sqaron Ministria e Drejtësisë dhe mediat britanike, rritja eksponenciale e numrit të të burgosurve shqiptarë në burgjet britanike është rrjedhojë e drejtpërdrejtë e zgjerimit të krimit shqiptar në ishull. Agjencia kombëtare e krimit ka paralajmëruar për grupet kriminale shqiptare që operojnë në vend, duke thënë se kanë kontroll të konsiderueshëm mbi trafikun e drogës në vend, sidomos atë të kokainës. Pas Holandës duket se Mbretëria e Bashkuar është vendi tjetër europian ku krimi shqiptar po zgjerohet.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.