Liberalizohen vizat për Kosovën – Qytetarët mund të lëvizin lirshëm në zonën Schengen

Kosova ka arritur liberalizimin e vizave për lëvizjen e lirë në Bashkimin Europian, pas përmbushjes së kritereve të përcaktuara nga Komisioni Europian. Në një deklaratë të përbashkët për shtyp nga Bruskeli, Presidenti i Kosovës Hashim Thaçi dhe Komisioneri për migracionin Dimitris Avramopolous njoftuan vendimin e KE.

Komisioneri Avramopolous tha se liberalizimi nuk ishte një dhuratë, por një vendim i merituar, pasi sipas tij Kosova i ka plotësuar të gjitha kriteret për liberalizimin e vizave. Ndërsa shtoi se tashmë kjo është në duart e Parlamentit dhe Këshillit Europian.

“Raporti i sotëm është i konfirmuar. Sot, nga këtu i bëj thirrje dhe inkurajoj Këshillin Europian dhe Parlamentin Europian që të lëvizin me shpejtësi”, deklaroi ai.

Ndërkohë, Thaçi e cilësoi liberalizimin e vizave një moment domethënës në rrugën europiane të Kosovës deri në anëtarësimin e saj në BE.

“Vendimi i sotëm i Komisionit Europian për të shpallur të përmbushur edhe kriterin në favor të liberalizimit të vizave për Kosovën është ndër lajmet më të mira që kanë pritur qytetarët e Kosovës në dekadë. Kjo përbën një moment historik dhe një njohje të përpjekjeve dhe një vlerësim të angazhimeve shumëvjeçare për të ankoruar shtetin e Kosovës në zemër të Europës. Sot ka filluar shembja e fundit e murit të izolimit të një shoqërie të tërë europiane”, u shpreh Thaçi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.