Menaxhimi i mbetjeve – Shteti merr hua mbi 14 milionë euro për trajtimin e tyre

Shteti Shqiptar do të marrë një hua nga shteti Gjerman, në vlerën e mbi 14 milionë euro për menaxhimin e mbetjeve në vend.

Për projektin “Program për menaxhimin e mbetjeve“ shteti ynë do të marrë një hua me kushte të favorshme, e cila akordohet në kuadër të bashkëpunimit publik zhvillimor, deri në 12 milionë euro, kur nga shqyrtimi përkatës ka rezultuar se projekti vlen për t’u mbështetur në kuadër të politikës zhvillimore dhe kur Republika e Shqipërisë vazhdon të jetë e besueshme lidhur me kreditë dhe kur Këshilli i Ministrave i Republikës së Shqipërisë jep garanci shtetërore, në rast se ai vetë nuk është huamarrës.

Për masa të nevojshme shoqëruese për zbatimin dhe mbikëqyrjen e projektit “Program për menaxhimin e mbetjeve” do të merret një hua në shumë financimi deri në 2 milionë euro si dhe një shumë për masa të nevojshme shoqëruese për zbatimin dhe mbikëqyrjen e projektit në vlerën e 500 mijë eurove.

Këshilli i Ministrave i Republikës së Shqipërisë, në rastet kur ai vetë nuk është huamarrës, do të garantojë  shtetin gjerman për  të gjitha pagesat me euro për shlyerjen e borxheve të huamarrësve, në bazë të kontratave, të cilat do të lidhen.

Ndërkohë që shteti shqiptar përjashton nga të gjitha tatimet dhe taksat e tjera publike, huadhënësin.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.