Nafta ndryshon minimalisht – Rezervat në SHBA rriten me 6.3 milionë fuçi

Nafta po tregtohet e qendrueshme në sesionin e sotëm, duke rikuperuar humbjet e realizuara gjatë tregtisë aziatike, që u përfshinë nga një shitje masive e aksioneve.

Nafta Brent e Londrës po tregtohet në rreth 76.3 dollarë për fuçi dhe ka humbur rreth 10 dollarë që nga data 3 tetor, kur tregtohej në 86.7 dollarë për fuçi.

Nafta bruto amerikane po tregtohet në rreth 66.8 dollarë për fuçi. Tregjet financiare janë goditur nga disa zhvillime, duke përfshirë luftën tregtare SHBA-Kinë, krizën e monedhave në disa vende në zhvillim, rritjen e kostos së huamarrjes dhe shqetësimet ekonomike për Italinë.

Shumë investitorë janë të shqetësuar edhe për rritjen e rezervave të naftës, sidomos në SHBA, në një kohë që oferta e ka tejkaluar kërkesën në disa vende.

Prodhimi në SHBA është rritur në mënyrë të qendrueshme, gjatë dekadës së fundit, dhe preku nivelin e 11.2 milionë fuçive në ditë, gjatë këtij muaji.

Gjithashtu, edhe rezervat tregtare u rritën për të pestën javë me radhë. Referuar të dhënave zyrtare të administratës për informimin mbi energjinë rezervat u rritën me 6.3 milionë fuçi, gjatë javës së kaluar, në totalin e 422.79 milionë fuçive.

Investitorët janë të shqetësuar edhe për impaktin e sanksioneve amerikane ndaj naftës iraniane, që do të hyjnë në fuqi në datën 4 nëntor.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.