Nafta, në rënie të lehtë – Prodhimi në SHBA në nivel rekord, rezervat bien me 8.6 mln fuçi

Çmimet e naftës po qendrojnë në rënie të lehtë në sesionin e sotëm, pasi ekonomia kineze tregoi shenja të ngadalësimit, kryesisht për shkak të luftës tregtare. Gjithashtu, çmimet po gjenden nën presion, për shkak të prodhimit rekord në SHBA. Nafta Brent e Londrës po tregtohet në rreth 65.7 dollarë për fuçi, ndërsa nafta Bruto amerikane po tregtohet në rreth 56.5 dollarë për fuçi. Aktiviteti i fabrikave në Kinë, që është importuesi më i madh i naftës në botë, ra për të tretin muaj me radhë gjatë shkurtit, si pasojë e rënies së porosive për eksport me hapin më të shpejtë që nga kriza financiare e një dekade më parë.

Përfaqësuesi amerikan në bisedimet e tregtisë, Robert Lighthizer, zbehu pritshmëritë për një rezolutë të shpejtë mbi tregtinë me Kinën. Ai tha se, çështja me Kinën është shumë serioze për tu zgjidhur shpejt, ndërsa Pekini ka premtuar se do të blerë më shumë mallra amerikane. Ndërkohë, prodhimi në Shtetet e Bashkuara të Amerikës vijoi rritjen dhe tashme gjendet në një rekord prej 12.1 milionë fuçi në ditë.

Megjithatë, marrëveshja e OPEC dhe Rusisë për të ulur prodhimin me 1.2 milionë fuçi në ditë ka ndihmuar në rritjen e çmimeve me rreth 20%, gjatë dy muajve të parë të këtij viti. Ulja e prodhimit ka ndihmuar në reduktimin e rezervave të naftës në SHBA, që për javën e kaluar ranë me 8.6 milionë fuçi, në totalin e 445.87 milionë fuçive.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.