Nafta rritet lehtë – Çmimet mbështeten nga tensioni me Arabinë Saudite
Çmimet e naftës po qëndrojnë në rritje në sesionin e parë të kësaj jave, për shkak të tensionimit të marrëdhënieve politike mes Arabisë Saudite dhe perëndimit, rreth dy javë përpara se sanksionet amerikane ndaj Iranit të hyjnë në fuqi.
Ministri i Energjisë në Arabinë Saudite, Khalid al-Falih, deklaroi për agjencinë ruse të lajmeve, TASS, se vendi i tij nuk ka ndërmend të vendosë një embargo ndaj konsumatorëve perëndimorë, siç ndodhi në vitin 1973, por do të fokusohet në rritjen e prodhimit për të kompensuar uljen e furnizimit në Iran dhe Venezuelë.
Disa ligjvënës në SHBA kanë sugjeruar vendosjen e sanksioneve ndaj Arabisë Saudite për vrasjen e gazetarit, Jamal Khashoggi, ndërsa Mbretëria, që është eksportuesi më i madh i naftës në botë, deklaroi se do të hakmerrej ndaj këtyre sanksioneve.
Ministri Falih deklaroi se, Arabia Saudite do të rrisë shumë shpejt prodhimin në 11 milionë fuçi në ditë, nga 10.7 milionë që prodhon aktualisht. Ai shtoi se, Rihadi zyrtar ka kapacitet për të rritur prodhimin në 12 milionë fuçi në ditë.
Nafta Brent e Londrës po tregtohet në rreth 80.2 dollarë për fuçi, ndërsa nafta Bruto amerikane po tregtohet në rreth 69.4 dollarë për fuçi. Sanksionet amerikane ndaj naftës iraniane hyjnë në fuqi në datën 4 nëntor dhe analistët mendojnë se rreth 1.5 milionë fuçi në ditë do të jenë në rrezik. Në treg ka shumë paqartësi, pasi edhe lufta tregtare SHBA-Kinë mund të dëmtojë kërkesën.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.