Nafta tërhiqet pas rekordit të së Mërkurës – Investitorët tremben nga komentet e Fed për të rritur interesat
Nafta është tregtuar në rënie në ditën e Enjte, ndërkohë që dollari u fuqizua pas shenjave se Rezerva Federale do të shtrëngojë së shpejti politikat monetare, në ekonominë më të madhe në botë dhe përdoruesin më të madh të naftës. Kontratat e naftës u tërhoqën prej rënies së gjerë në tregjet financiare, pasi Fed projetkoi një rritje të normës bazë të interesit në Mars dhe dollari u rrit kundër valutave rivale. Nafta e denominuar në dollar bëhet më e shtrenjtë për blerësit që përdorin valuta të tjera, kur dollari rritet. Nafta Brent, çmimi referencë në bursën e Londrës, ra me 0.6% në 89.44 dollarë për fuçi, pasi humbi rreth 1.1% më herët gjatë Tregtisë.
Kontrata britanike kishte shtuar 2% në tregtinë e së Mërkurës. Nafta bruto amerikane, ra gjithashtu me 0.6%, në 86.77 dollarë për fuçi, pasi humbi mbi 1.2% më herët. Edhe kontrata amerikane kishte shtuar mbi 2% në tregtinë e djeshme. Dollari u rrit duke ndjekur edhe interesat e titujve të Thesarit, ç’ka sollin rritjen e indeksit të dollarit, që mat performancën e valutës kundër valutave rivale. Një ditë më parë, çmimet e naftës ishin rritur në 90$ për fuçi për të parën herë në 7 vite, ndërkohë që tensionet në Ukrainë, kanë rritur shqetësimet për ndërprerje në Europë.
OPEC nga ana tjetër, ka dështuar të rrisë prodhimin drejt objektivit për muajin Dhjetor, duke vënë në dukje sfidat në kapacitet që po limitojnë ofertën, ndërkohë që kërkesa botërore po rimëkëmbet nga nivelet e pandemisë. Megjithatë, rritja e inventarëve të naftës bruto dhe benzinës në SHBA, zbutën pak shqetësimet mbi ofertën. Inventarët e naftës bruto u rritën me 2.4 milionë fuçi në javën që përfundoi më 21 janar, në 416.2 milionë në total, ndërkohë që analistët prisnin një rënie.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.