Nafta vijon rritjen – Rënia e prodhimit në SHBA mbështet çmimet

Çmimet e naftës vijojnë të qëndrojnë pranë nivelit më të lartë në 3 vitet e fundit. Megjithatë, për shkak të rritjes me rreth 13% që nga fillimi i dhjetorit, analistët paralajmërojnë për një mbinxehje të tregut.

Rënia surprizë e prodhimit dhe rezervave të naftës në SHBA kanë ofruar një mbështetje për çmimet. Nafta Bruto amerikane po tregtohet në rreth 63.9 dollarë për fuçi, niveli më i lartë që nga dhjetorit i vitit 2014.

Ndërsa nafta Brent po tregtohet në rreth 69.4 dollarë për fuçi, që njëkohësisht është niveli më i lartë që nga maji i vitit 2015.

Çmimet janë gjendur gjithashtu nën presion për shkak se, prodhuesi i dytë dhe prodhuesi i tretë më i madh i OPEC, Irani dhe Iraku, ulën çmimet e prodhimit për të qenë më konkurrues përballë konsumatorëve.

Deri më tani, më pjesën më të madhe, çmimet e naftës janë mbështetur nga marrëveshja e Organizatës së Vendeve Prodhuese të Naftës dhe Rusisë, që kanë ulur prodhimin me 1.8 milionë fuçi në ditë, nga janari i 2017 deri në fund të këtij viti.

Përsa i përket të dhënave ekonomike, rezervat e naftës bruto në SHBA ranë me 5 milionë fuçi, gjatë javës që u mbyll më 5 janar., në totalin e 419.5 milionë fuçive.

Në anën tjetër, prodhimi në SHBA ra me 290 mijë fuçi, në totalin e 9.5 milionë fuçive në ditë, deklaroi Administrata mbi Informimin mbi Energjinë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.