NATO, prezencë afat-gjatë në lindje – Stoltenberg: Do përforcojmë krahun lindor, për arsye të mbrojtjes

NATO do të konsiderojë një prezencë afat-gjatë në Europën Juglindore në muajt e ardhshëm, sipas sekretarit të përgjithshëm të Aleancës, Jens Stoltenberg, që i bëri komentet e tij gjatë një fjalimi në një bazë ushtarake në Rumani.  Deklarata e tij erdhi pas paralajmërimeve nga Shtetet e Bashkuara se Rusia mund të sulmojë në çdo moment, pasi ka rritur trupat në kufi me Ukrainën dhe ka zhvilluar stërvitje ushtarake në Bjellorusi.

“Ne do të vazhdojmë të përforcojmë krahun tonë lindor, me më shumë anije, më shumë avionë, më shumë trupa dhe jemi gjithashtu gati të shtojmë përforcimet në mënyrë të shpejt. Kemi rritur gatishmërinë e Forcës Reaguese dhe mund të shpërndajmë trupa menjherë nëse do të duhet”, u shpreh Jens Stoltenberg, Sekretari i Përgjithshëm i NATO.

Sekretari i Përgjithshëm i NATOs, tha se prezenca e trupave amerikanë në Rumani, vërteton angazhimin e Shteteve të Bashkuara për sigurinë e Europës. Në krahun lindor, nga Deti i Zi e deri tek vendet Baltike, aleatët e NATOs kanë shpërndarë forca shtesë dhe pajisje. Stoltenberg shpjegoi se kjo përbën një reagim mbrojtjës, ndaj mbledhjes së trupave rus në kufi me ukrainën.

Ndërkohë, Ukraina mori gjithashtu së fundmi një dërgesë të armëve nga Shtetet e Bashkuara, që është pjesë e paketës së sigurisë prej 200 milionë dollarë.  Paletat me armë u zbarkuan nga një avion në aeroportin Boryspil në Kiev, ku u ngarkuan në kamionë nga ushtarët ukainas.  Ukraina ka marrë disa pako të ndihmave ushtarake nga Shtetet e Bashkuara në muajt e fundit.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.