Një pengesë e madhe për Europën – Sektori i makinave. Shitjet bien për të 5-in muaj radhazi

Shitjet e makinave kanë rënë për të pestin muaj radhazi gjatë Janarit,  duke dhënë një shenjë shqetësuese për ekonomitë e kontinentit, që përballen me një recesion teknik në Itali (2 tremujorë radhazi të tkurrjes), pasiguri nga zgjedhjet e parakohshme në Spanjë dhe dalja e Britanisë pa marrëveshje me BE.

Regjistrimet e makinave të reja për pasagjerë ranë me 4.6% me bazë vjetore, në 1.23 milionë, në Bashkimin Europian dhe Shoqatën Europiane të Tregtisë së Lirë (EFTA).

Shoqata Europiane e Prodhuesve të Makinave bëri të ditur se shitjet kanë rënë në të gjithë tregjet e mëdhenj të rajonit si Gjermania, Franca, Mbretëria e Bashkua, Italia dhe Spanja, gjë që e ka kthyer sektorin e makinave në performuesin më të dobët në tregjet e kapitalit.

Kjo nisi në Shtator të vitit të kaluar, kur u prezantuan rregullat e reja të emetimit të gazrave. Gjermania i shpëtoi recesionit në fund të 2018-ës dhe Banka Qendrore Europiane bëri të ditur se rreziku ndaj perspektivës ekonomike është rritur.

Ndër 5 tregjet kryesore në Europë, Spanja pati rënien më të madhe në shitjen e makinave, me 8%, ndjekur nga Italia, ku pati rënie të kërkesës me 7.5%.

Audi dhe Porsche, 2 markat që nxisin fitimin e Volkswagen, patën rënie dyshifrore.  Volkswagen ka hasur vështirësi në përgatitjen e makinave për standardet e reja të emetimit.

Brexit po bën gjithashtu jehonë te industria e makinave, ndërkohë që Renault  dhe Ford paralajmëruan se dalja pa marrëveshje do të jetë katastrofike.

Një tjetër shqetësim është lufta tregtare mes Shteteve të Bashkuara dhe Kinës. Rritja e tarifave në importe nga SHBA, do të godiste prodhuesit gjerman, kryesisht Porsche dhe Audi.

BMW dhe Daimler do të pësonin goditje gjithashtu, pasi eksportojnë fuoristradat amerikane në Kinë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.