Optimizëm për Francën – Projeksionet flasin për një rritje prej 1.6% për këtë vit
Banka Qendrore e Francës projekton një rritje të ekonomisë së vendit me 0.5% gjatë tremujorit të tretë, në nivel të pandryshuar në krahasim me tremujorin e dytë.
Ky parashikim flet edhe për një rimëkëmbje të sektorit industrial, atë të shërbimeve dhe atë të ndërtimit. Të dhënat janë publikuar në anketën e klimës së biznesit.
Ky indikator ra në 99 pikë gjatë Korrikut, nga 100 pikë që ishte gjatë muajit Qershor. Edhe nën-indikatori i sektorit të ndërtimit ka rënë lehtë në krahasim me Qershorin. Agjencia Kombëtare e Statistikave në Francë projekton një rritje ekonomike të vendit prej 1.6% përgjatë këtij viti.
Ky do të ishte niveli më i lartë që prej vitit 2011, dhe lajmi më i mirë për tregun e punës. Një normë rritje prej 1.5% vlerësohet si minimumi i nevojshëm për të nxitur një rënie të papunësisë.
Ekonomia franceze prej vitesh dështon që të prodhojë shifra të kënaqshme makro-ekonomike, dhe kjo është reflektuar drejtpërdrejtë edhe në të ardhurat e familjarëve dhe konsumin privat.
Ishte pikërisht ekonomia e dobët që rrëzoi socialistët nga pushteti me një rezultat poshtërues, si në zgjedhjet presidenciale, ashtu edhe në ato parlamentare.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.