Organet dhe personeli i Vettingut – Opozita e bashkuar apel për rishqyrtim të vendimit të Kuvendit

Pa një Vettitng të pavarur me integritet të lartë nuk mund të ketë në asnjë mënyrë një luftë efikase ndaj krimit të organizuar. Kështu është shprehur në një dalje për median kryetari i grupit parlamentar të LSI, Petrit Vasili. Sipas Vasilit vendimi i marrë së fundmi në Kuvend për organet e Vettingut dhe personelin përkatës duhet që të kthehet dhe të rishqyrtohet.

Gjithçka që është investuar për Vettingun, ka qenë për të investuar një Vetting tërësisht të pavarur, me integritet të lartë, profesional, moral dhe ligjor e cila do të garantonte këtë proces dhe të ardhmen e shqiptarëve.

Është akoma në kohë që të rishikohen dhe të kthehen mbrapsht këto veprime të turpshme dhe skandaloze, provë e një kapje të pacipë të Vettingut nga maxhoranca. Nuk ka më kohë as për të heshtur, nuk ka më kohë as për të qëndruar pasiv.

Në rast se kjo nuk do të ndodhë, ne nuk do të bënim asgjë tjetër, por Shqipërinë do ta linim në dorë të këtyre bandave, të cilat janë në dritën e diellit dhe të cilat sot Ambasadori Amerikan pati meritën e madhe që ti tregojë me gisht.

Më herët edhe  kryetari i grupit të PD Edmond Spaho i ka nisur në letër ambasadave në vend sa i përket vendimit  më të fundit të Kuvendit për  personelin dhe organet e Vettingut. Ndër të tjera në letër shkruhet se:

“Kuvendi ka detyrimin kushtetues të mbështesë veprimtarinë e organeve të rivlerësimit, duke i mundësuar atyre të gjithë mbështetjen me burime njerëzore dhe financiare që kërkohet. Ajo që mund të bëjë Kuvendi është që në diskutim dhe dakortësi me organet e pavarura, të bëjë një shpërndarje të drejtë të burimeve njerëzore të kërkuara, duke vendosur theksin tek efikasiteti i procesit të rivlerësimit kalimtar të gjyqtarëve dhe prokurorëve.”

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.