Perëndimi kërkon që Rusia të pezullohet nga Interpoli!

Disa vende perëndimore, duke përfshirë Britaninë e Madhe dhe Shtetet e Bashkuara, i kanë bërë thirrje Interpolit që të pezullojë Rusinë nga organizata ndërkombëtare e zbatimit të ligjit, sipas Sekretarit të Brendshëm britanik Priti Patel.

Mbretëria e Bashkuar, Shtetet e Bashkuara, Kanadaja, Australia dhe Zelanda e Re kanë kërkuar “pezullimin e menjëhershëm të aksesit të Rusisë në sistemet e saj”, shkroi Patel të dielën.

Grupi i kërkoi komitetit ekzekutiv të Interpolit të merrte një vendim këtë javë.

Ndërsa Patel nuk specifikoi arsyen e kërkesës, aleatët perëndimorë kanë kërkuar të izolojnë diplomatikisht dhe ekonomikisht Moskën për pushtimin e saj të fqinjit të Evropës Lindore, Ukrainës.

Të dielën, kryediplomati amerikan Antony Blinken tha se Uashingtoni kishte parë “raporte shumë të besueshme” se Rusia kishte kryer krime lufte gjatë inkursionit, veçanërisht në trajtimin e civilëve.

Në Këshillin e OKB-së për të Drejtat e Njeriut javën e kaluar, anëtarët votuan me shumicë dërrmuese për të ngritur një hetim mbi akuzat për abuzime të kryera nga forcat e Moskës në Ukrainë.

Interpoli, një rrjet prej 194 vendeve anëtare, synon të lehtësojë policimin e krimeve ndërkombëtare. AFP

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.