Përmasa e goditjes së Covid-19 tek tregtia, OBT: Volumi botëror në mallra ka rënë me 14.3% në T2
Volumi i tregtisë së mallrave në të gjithë botën ka rënë me 14.3% në tremujorin e dytë 2020, nga i pari, për shkak të Covid-19, ndërkohë që rëniet më të mëdha janë vëzhguar në Europë dhe Amerikën e Veriut, sipas të dhënave të Organizatës Botërore të Tregtisë. Eksportet dhe importet e mallrave ranë me 15% dhe 13.6% në mënyrë respektive në të gjithë botën në tremujorin e dytë. Tregtia e mallrave në Europë dhe Amerikën e Veriut u tkurr me 21% dhe 20% respektivisht, ndërsa Azia mbeti më pak e ndikuar, me një rënie prej 7%. Tregtia në mallra e denominuar në dollar amerikan ra me 21% në tremujorin e dytë me bazë vjetore.
Tregtia botërore në shërbime ka regjistruar një rënie më të madhe. Të dhënat paraprake nga 38 vende që zhvillojnë mbi 2/3 e tregtisë botërore në shërbime, treguan në muajt Prill dhe Maj se tregtia ra me 30% me bazë vjetore. Në veçanti, Amerika e Veriut pësoi një rënie me 30% në eksportet e shërbimeve në Korrik, ndërsa Kina pati një performancë surprizuese, duke patur rimëkëmbje në të njëjtën periudhë.
Organizata Botërore e tregtisë projektoi në Prill se tregtia botërore do të tkurret me 13-32% në vitin 2020. Megjithatë, rezultati do të varet kryesisht ndaj vendimit të politikave në lidhje me kontrollin e pandemisë, që po godasin rëndë tregtinë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.