Pse senatorët amerikanë po hetojnë adoptimin e Bitcoin në El Salvador?!
Presidenti i El Salvadorit, Nayib Bukele, kërkoi të mërkurën senatorëve amerikanë që të qëndrojnë jashtë “çështjeve të brendshme” të vendit pasi ata bënë thirrje për një hetim mbi rreziqet ekonomike me të cilat përballen Shtetet e Bashkuara për shkak të adoptimit të Bitcoin nga vendi i Amerikës Qendrore si mjet ligjor.
Senatorët Jim Risch, Bill Cassidy dhe Bob Mendez i kërkuan Departamentit të Shtetit të paraqesë një raport mbi zbatimin e Bitcoin në El Salvador me qëllim të vlerësimit të rreziqeve që paraqet për ekonominë amerikane.
El Salvador ishte vendi i parë në botë që miratoi kriptomonedhën për përdorim zyrtar, paralelisht me dollarin amerikan, një vendim që ka shkaktuar kritika të ashpra nga Fondi Monetar Ndërkombëtar (FMN).
Senatorët amerikanë shprehën gjithashtu frikën për faktin se adoptimi i Bitcoin mund të dobësojë politikën e sanksioneve të qeverisë amerikane dhe të rrisë aktivitetin e organizatave kriminale.
Qeveria e Salvadorit, e cila ka blerë rreth 1,801 Bitcoin që nga shtatori, është marrë në pyetje nga ekonomistët dhe opozita për refuzimin e saj për të qenë përgjegjës në procesin e blerjes dhe menaxhimit të fondeve.
Marrëdhëniet diplomatike midis El Salvadorit dhe Shteteve të Bashkuara janë përkeqësuar pasi Shtëpia e Bardhë denoncoi publikisht rastet e korrupsionit në qeverinë e Bukeles dhe një përshkallëzim të masave për akumulimin e pushtetit.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.