Rama, Zaev dhe Vuçiç, konferencë “online” / “Katër liritë e BE, të zbatohen sa më shpejt edhe në Ballkan”
Kryeministri i Shqipërisë, Edi Rama, ai i Maqedonisë së Veriut, Zoran Zaev dhe presidenti i Serbisë, Aleksandër Vuçiç zhvilluan një konferencë online në kuadër të nismës së quajtur Shengeni Ballkanik. Tre liderët kërkuan që liria e lëvizjes së njerëzve, mallrave, shërbimeve dhe kapitalit të fillojë të zbatohet sa më shpejt në të gjithë vendet e rajonit. Në deklaratën e përbashkët të tre liderëve thuhet se “dështimi i përsëritur i BE-së për të përmbushur premtimet dhe paaftësia për të ecur përpara me hapjen e konferencave të para ndërqeveritare me Shqipërinë dhe Maqedoninë e Veriut, është kundër vullnetit europian të vendeve tona dhe po aq, kundër interesave të vetë BE-së”. Për këtë arsye, kërkohet që katër liritë e BE-së të zbatohen në të gjithë rajonin. “Në këtë frymë, ne do të shprehim mbështetjen tonë të plotë për tregun e përbashkët rajonal në Samitin e Procesit të Berlinit të 5 korrikut”, thuhet më tej në deklaratë. “Si një rajon me rreth 18 milionë njerëz, ne mund të forcojmë së bashku ekonomitë tona, të rritim mirëqenien e njerëzve dhe të sjellim investime të mëdha, që përndryshe nuk do të ishin të mundshme për secilin prej nesh veç e veç”, vijon deklarata. Takimi i radhës në kuadër të kësaj nisme do të zhvillohet fizikisht më 29 korrik në Shkup, ku do të nënshkruhen disa marrëveshje që zbatojnë angazhimet e Samitit të Berlinit, si marrëveshja për bashkëpunimin dhe ndihmën në rast të katastrofave natyrore dhe ajo për lehtësimin e tregtisë, eksporteve dhe importeve.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.