Rriten projeksionet për Italinë – Optimizëm për ekonominë e vendit, shqetëson papunësia

Konfindustria italiane ka rritur projeksionet për ekonominë e vendit gjatë këtij viti dhe atij të ardhshëm. Për 2017-ën, projeksionet tashmë fiksohen në 1.3%, nga 1.1% që vlerësohej më parë, sa i përket vitit të ardhshëm, tashmë vlerësohet një rritje në 1.5%, nga 1.3% që ishte më parë.

Këto projeksione reflektojnë kështu të dhënat mjaft pozitive që ka raportuar ekonomia e tretë më e madhe e Eurozonës gjatë muajve të fundit. Këto të dhëna kanë sinjalizuar një rimëkëmbje më të shpejtë të ekonomisë italiane, duke prodhuar shpresë.

Rritja e projeksioneve merr shtysë kryesisht nga performanca mbi pritshmëritë e tremujorit të dytë të këtij viti, ku rritja fiksohej pranë 0.4%, nga 0.3% që vlerësohej paraprakisht. Në vitin 2018 ndërkohë projektohet që Prodhimi i Brendshëm Bruto i Italisë të jetë 4.7% nën nivelin e vitit 2008, çka sinjalizon se, rimëkëmbja e plotë është ende vite larg.

Qeveria italiane ndërkohë ende nuk i ka rishikuar projeksionet, paçka se, shumë institucione ndërkombëtare dhe kombëtare kanë vepruar në këtë mënyrë, përfshirë gjigandin e vlerësimeve Moody`s.

Konfindustria në raportin e fundit nënvizon se, thembra e Akilit e ekonomisë italiane është papunësia e lartë e të rinjve. Në krahasim me vitet e para krizës janë rikuperuar plot 1 milionë vende pune, dhe mbeten edhe 7.7 milionë persona të papunë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.