Serviset dhe koncesionarët – QKB: Duhet të paraqiten për t’u licencuar sipas ligjit

Të gjithë subjektet që ushtojnë aktivitetin si servise autoriparimi, që tregojnë pjesë të reja apo të përdorura si dhe koncensionarët e makinave duhet të licencohen për të zhvilluar normalisht aktivitetin e tyre.

Qendra Kombëtare e Biznesit në një njoftim të sajin ka bërë me dije për këtë kërkesë ligjore e cila do të shtrihet në kohë dhe do të përfshijë të gjithë bizneset e kësaj natyre.

Aktualisht të gjitha këto subjekte të kategorizuara si servise, koncensionarë, apo dyqane shitjeje të pjesëve të këmbimit të reja apo të vjetra ushtrojnë aktivitetin pa pasur një licencë dhe vetëm me regjistrimin.

Burime pranë Qendrës Kombëtare të Biznesit bënë me dije për TV SCAN se regjistrimi dhe NIPT-i nuk janë kushti i vetëm që duhet të plotësohet.

Duke ju përshtatur amendimeve ligjore subjektet duhet që të disponojnë në vijim kategorinë specifike të licencës. Për ta marrë këtë të fundit duhet të plotësohen disa kushte mes të cilave ajo për drejtuesin teknik brenda subjektit.

Ky i fundit është personi që ka eksperiencën e duhur dhe që garanton mbarëvajtjen e aktivitetit dhe certifikohet nga ana e Drejtorisë së Shërbimit të Transportit Rrugor që është nën varësinë e Ministrisë së Transportit.

Të pasurit në ekipin e burimeve njerëzore të këtij eksperti i jep mundësinë subjektit që të licencohet.

QKB bën me dije se për të përballuar volumin licencimi i gjithë subjekteve ekzistuese dhe atyre të reja do të ketë një afat të konsiderueshëm në dispozicion.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.