Shefi i Pentagonit: Putin ka hequr dorë nga pushtimi i Kievit!

Sekretari amerikan i Mbrojtjes, Lloyd Austin tha të enjten se presidenti rus Vladimir Putin ka hequr dorë nga pushtimi i Kievit pasi forcat e tij u mundën ashpër nga ushtria ukrainase. “Putin mendoi se ai mund të merrte shumë shpejt shtetin e Ukrainës, të pushtonte shumë shpejt këtë kryeqytet. Ai e kishte gabim,” tha Austin në një seancë dëgjimore të Komitetit të Shërbimeve të Armatosura të Senatit në Kongres. “Unë mendoj se Putin ka hequr dorë nga përpjekjet e tij për të kapur kryeqytetin dhe tani është i fokusuar në jug dhe lindje të vendit,” tha Austin.

Por rruga e luftës së përgjithshme, gjashtë javë pasi Rusia pushtoi Ukrainën, mbetet e pasigurt, tha në të njëjtën seancë kryetari i Shefave të Shtabit të Përbashkët, Gjenerali Mark Milley. Që Ukraina të “fitojë” luftën, ajo duhet të mbetet një komb i lirë dhe i pavarur, me territorin e saj të njohur të paprekur, tha ai. “Kjo do të jetë shumë e vështirë. Kjo do të jetë një punë e gjatë,” tha Milley.

“Pjesa e parë e saj ndoshta është zhvilluar me sukses,” tha ai për luftën që filloi më 24 shkurt. “Por ka një betejë të rëndësishme ende përpara poshtë në juglindje, poshtë rreth rajonit të Donbas, ku rusët synojnë të masivizojnë forcat dhe vazhdojnë sulmin e tyre”, tha ai. “Kështu që unë mendoj se është një pyetje e hapur tani, si përfundon kjo.”

Austin i tha panelit të ligjvënësve se Shtetet e Bashkuara po ofrojnë inteligjencë për ushtrinë e Ukrainës për të mbështetur luftën e saj në Donbas, ku separatistët e mbështetur nga Moska kanë luftuar forcat qeveritare që nga viti 2014 dhe tani kanë mbështetjen e drejtpërdrejtë të trupave ruse. Por Milley tha se lufta në atë zonë do të jetë e vështirë dhe se në përpjekje për të larguar rusët, Ukraina ka të ngjarë të ketë nevojë për më shumë mbështetje armësh, si tanke.

“Lufta poshtë në juglindje — terreni është i ndryshëm nga ai në veri,” shpjegoi Milley. “Ai është shumë më i hapur dhe i jep vetes forca të blinduara, operacione të mekanizuara sulmuese, në të dyja anët. Dhe kështu këto janë sistemet që ata po kërkojnë,” tha ai. “Ata po kërkojnë dhe ndoshta mund të përdorin armaturë dhe artileri shtesë,” tha ai. AFP

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.