Shkrirja në industrinë kimike – “Clariant” dhe “Huntsman” bashkohen në një gjigant prej $ 20mld
Prodhuesi amerikan i kimikateve, Huntsman Corp. dhe kompania zvicerane, Clariant, do të shkrihen në një gjigant të këtij sektori me një vlerë tregu prej më shumë se 14 miliardë dollarë. Deklaratat vijnë nga vetë kompanitë, pasi ka pasur edhe më parë iniciativa mes tyre.
Marrëveshja krijon një kompani globale të specializuar në produktet kimikate, të zotëruar në 52% nga aksionerët e Clariant dhe që vlerësohet në 20 miliardë dollarë nëse përfshihet edhe borxhi, deklaron kompania zvicerane.
Shumë kompani europiane janë angazhuar në blerje apo shkrirje, ndërkohë që industria e produkteve kimikate është ngadalësuar gjatë kohëve të fundit. Bizneset europiane kanë humbur pjesë tregu ndaj rivalëve aziatikë, ku kërkesa po rritet me ritme më të shpejta.
Peter Huntsman do të jetë kreu ekzekutiv i kompanisë së re, të quajtur HuntsmanClariant, ndërsa Hariolf Kottman, ish kreu i kompanisë zvicerane, do të ketë rolin e presidentit të firmës. Selia do të qëndrojë në Zvicër, ndërsa qendra e operacioneve do të kalojë në Teksas. Materialet plastike dhe veshjet do të jetë prioriteti i kompanisë së re, thotë Kottmann.
Ndër këshilluesit e kompanisë zvicerane kanë qenë UBS dhe Citi, ndërsa për Huntsman, banka Merrill Lynch ka shërbyer si këshillues financiar.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.