Shqipëria ka ngecur në vend! – Që prej vitit 2008 nuk ndryshon pesha që ekonomia zë në PBB e Europës
Ekonomia shqiptare ka rritur me plot 3 herë peshën e saj në ekonominë europiane në harkun e dy dekadave Kështu, të dhënat e përpunuara nga `Ilsole24ore`, tregojnë qartë se në vitin 1997 ekonomia shqiptare zinte vetëm 0.2% të ekonomisë europiane. Sot që flasim kjo peshë fiksohet në 0.6%. Por, pavarësisht se flasin për një progres të ndjeshëm në harkun e 20 viteve të ekonomisë shqiptare në skenën europiane, shifrat japin edhe një anë tjetër të medaljes; ne kemi ngecur në vend.
Që prej vitit 2008, situata mbetet e pandryshuar, me ekonominë shqiptare që zë vetëm 0.6% të Prodhimit të Brendshëm Bruto të kontinentit të vjetër. Kjo e dhënë merr një trajtë tjetër po të kemi parasysh se, frekuenca e rritjes së peshës së ekonomisë shqiptare ndër vite, të paktën deri në 2008, ka qenë shumë e rregullt. Mesatarisht ka pasur një kapërcim me 0.1 pikë përqindje çdo 3 vite. Ndërsa në 10 vitet e fundit nuk ka asnjë kapërcim.
Nuk mund të jetë thjesht rastësi fakti që, ngecja e ekonomisë shqiptare përkon ekzaktësisht me krizën financiare globale. Kjo s’do të thotë aspak se, kriza ka goditur ekonominë shqiptare më shumë se të tjerat, por vetëm progresin e Shqipërisë karshi ekonomive të tjera të Europës. Kriza e vitit 2008 i ka vendosur shkopinjtë nën rrota marshimit të ekonomisë shqiptare në arenën europiane.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.