S’reshtin ndërtimet pa leje – Prokuroria: 1310 procedime penale e 797 të dënuar, shumica në Tiranë e Durrës
Megjithëse ka shënuar ulje vitit të fundit, fenomeni i ndërtimit pa leje vijon të shënojë shifra të larta. Sipas të dhënave zyrtare të prokurorisë, vetëm gjatë vitit të shkuar janë kryer 1310 procedime për veprën penale të ndërtimit të paligjshëm, që kanë sjellë edhe dënimin e 797 personave.
Numri vjen në ulje krahasuar me një vit më parë, kur për këtë vepër u kryen 1987 procedime dhe u dënuan 519 persona. Numri më i ulët i hetimeve për ndërtime pa leje i takon vitit 2016, kur u regjistruan 893 procedime.
Numrin më të madh të procedimeve të regjistruara për këtë vepër penale e kanë prokuroritë e shkallës së parë Tiranë e Durrës që përbëjnë 16 % të numrit total të procedimeve në shkallë vendi dhe në vijim prokuroria e shkallës së parë Shkodër që ka regjistruar 13 % të numrit total të procedimeve në shkallë vendi.
Në lidhje me arsimin e të pandehurve për vlerat që kanë të bëjnë me cenimin e regjimit juridik të tokës, rezulton se 40,04 % janë me arsim të mesëm, 4,36 % të pandehur me arsim të lartë dhe pjesa tjetër prej 55,60 % me arsim 9 vjeçar.
Në sektorin privat rezultojnë të punësuar 35,57 % e të pandehurve, në sektorin shtetëror 1,93 % dhe pjesa tjetër e të pandehurve prej 62,50 janë të papunë. Nga treguesit vërehet se 40,15 % e të pandehurve kanë vendbanimin në qytet, ndërsa 59,85 % prej tyre në fshat.
Pra për këtë grup vërehet tendenca më e lartë në fshat. Në lidhje me gjendjen gjyqësore të të pandehurve, theksojmë se pjesa më e madhe e tyre janë të padënuar më parë dhe rreth 1 % e të pandehurve janë të dënuar më parë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.