Stërvitja e përvitshme e NATO-s – Shqipëria, e gatshme të paguajë 2% të PBB për mbrojtjen (VIDEO)

Forcat e Armatosura të Shqipërisë morën pjesë në stërvitjen e përvitshme “Saber Guardian”. Stërvitja u organizua nga vendet anëtare të NATO-s dhe përfshiu 25,000 ushtarakë, nga të cilët 14,000 janë Amerikanë.

Stërvitja e këtij viti zgjati nga datat 11-20 Korrik dhe u zhvillua në territorin e tre shteteve anëtare të NATO-s: Bullgari, Hungari dhe Rumani. Stërvitja tregoi vendosmërinë e Amerikës ndaj sigurisë dhe stabilitetit në Rajonin e Detit të Zi dhe në Ballkan. Stërvitja ishte pjesë e Programit të Njësisë së Stërvitjes së Përbashkët Amerikano-Europiane e krijuar për të rritur bashkëpunimin me vendet aleate si Shqipëria.

Vendi ynë është i vendosur në kontributin që japin forcat tona të armatosura në NATO. Kështu Ministrja e Mbrojtjes, Mimi Kodheli është shprehur se Shqipëria është e gatshme të plotësojë detyrimet e saj për shpenzime për mbrojtjen prej 2 për qind të Prodhimit të Brendshëm Bruto. Edhe pse është rënë dakord që këto shifra për mbrojtjen të plotësohen deri në vitin 2024.

Një lajm i mirë për Shqipërinë është edhe renditja e saj në  indeksin e fuqisë që  analizon 127 vende të botës duke i listuar në bazë të fuqisë ushtarake, Shqipëria renditet në vendin e 92-të në botë. Në analizë merren rreth 50 faktorë të ndryshëm, veç atyre të logjistikës apo numrave në ushtri. Ndër faktorët e tjerë të marrë në konsideratë janë edhe pozita gjeografike, vendburimet e naftës, fuqia financiare, etj.

Lista është bërë në mënyrë të tillë që vendet e vogla të kenë mundësi të konkurrojnë me vendet e mëdha, pasi vë theksin te rëndësia e diversifikimit të arsenalit dhe jo te sasia.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.