Studimi/ Omicron ndalon në grykë dhe “kursen” mushkëritë!
A infekton vërtet Omicron më shumë fytin dhe më pak mushkëritë? Duket kështu: prandaj përhapet më lehtë, por shkakton sëmundje më pak të rënda.
Ndërsa numri i personave pozitivë ndaj Covid-it rritet, kërkimet vazhdojnë të kuptojnë plotësisht se si funksionon varianti i ri Omicron: studimet e fundit (të gjitha ende të pa rishikuara nga kolegët, d.m.th. të pa shqyrtuara nga shkencëtarë të tjerë) arrijnë në përfundimin se Omicron duket se infekton më lehtë fytin dhe më pak ka të ngjarë mushkëritë sesa variantet e mëparshme të SARS-CoV-2. Kjo do të shpjegonte ngjitshmërinë më të madhe ashtu edhe ashpërsinë më të ulët – kjo karakteristikë e fundit e theksuar tashmë në një studim të Afrikës së Jugut në fund të dhjetorit, i cili zbuloi një ulje prej 80% të numrit të shtrimeve në spital për Omicron në krahasim me variantet e mëparshme.
Një studim i Grupit Kërkimor të Virologjisë Molekulare të Universitetit të Liverpool-it zbuloi se minjtë e infektuar me Omicron humbën më pak peshë, kishin ngarkesa më të ulëta virale dhe morën pneumoni më pak të rënda sesa ata të infektuar me Delta: një tjetër kërkim i kryer mbi hamsterët sirianë doli në përfundime të ngjashme, ndërsa një studim nga Qendra për Kërkimin e Viruseve në Universitetin e Glasgow zbuloi se Omicron ndryshoi mënyrën se si hyn në trupin tonë, duke shmangur mbrojtjen e dhënë nga dy doza të vaksinës.
“Rezultatet e këtyre studimeve janë qetësuese, por ato në asnjë mënyrë nuk duhet të na bëjnë të humbasim vigjilencën,” paralajmëron James Stewart (Universiteti i Liverpulit). Virusi është ende shumë i rrezikshëm për subjektet më vulnerabël – siç janë njerëzit e imunosupresionuar dhe të moshuarit – dhe aq më tepër për ata që nuk janë të vaksinuar: nëse është e vërtetë që vaksina nuk parandalon kontraktimin e sëmundjes, ajo redukton në mënyrë drastike rrezikun për të zhvilluar forma të rënda ose fatale. FCS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.