Sulmi kibernetik ndaj Kryqit të Kuq ekspozon të dhënat e gjysmë milioni njerëzish të cenueshëm!
Hakerët që synojnë Kryqin e Kuq Ndërkombëtar (ICRC) kanë vjedhur të dhënat personale të më shumë se gjysmë milioni njerëzve “shumë të cenueshëm”.
Organizata humanitare, e cila punon me viktimat e luftës, të zhdukurit dhe të burgosurit në mbarë botën, tha se kishte qenë viktimë e një “sulmi të sofistikuar kibernetik”. Është ende e paqartë se kush e kreu sulmin.
Por ICRC iu bëri thirrje kujtdo që kishte marrë të dhënat që të mos i nxirrte ose t’i shpërndante ato.
Ajo tha se informacioni konfidencial për 515,000 njerëz – shumë prej tyre viktima të cenueshme të luftës – ishin marrë. Të dhënat erdhën nga më shumë se 60 shoqata kombëtare të Kryqit të Kuq dhe Gjysmëhënës së Kuqe në mbarë botën.
Organi me bazë në Gjenevë tha se hakerët kishin shënjestruar një kompani të jashtme në Vjenë, të cilën ICRC e përdor për të ruajtur të dhënat. Nuk ka asnjë shenjë që të dhënat janë nxjerrë ende, por organizatës i është dashur të mbyllë sistemin që përdor për të ribashkuar familjet e ndara nga lufta.
Drejtori i Përgjithshëm, Robert Mardini tha se hakerimi i vuri njerëzit e cenueshëm në rrezik më të madh. Dhe ai u bëri thirrje përgjegjësve që “të bëjnë gjënë e duhur – mos i ndajnë, mos i shesin, nxjerrin ose përdorin ndryshe këto të dhëna”. BBC
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.