Të dytët në rajon për internet – Rritje me 11.2% të lidhjeve me brez të gjerë, vetëm Mali i Zi më mirë në CEE

Shqipëria është vendi i dytë ndër ato të Europës Qendrore dhe Lindore sa i përket rritjes së tregut të internetit përgjatë 2017-ës. Rritja e këtij tregu në vendin tonë, sipas IDC, fiksohet në 11.2%. Rritje më të madhe se vendi ynë përgjatë vitit të kaluar ka njohur vetëm mali i Zi, me 12.3%.

Të dhënat e fundit të IDC tregojnë gjithashtu se, gjatë këtij viti, sektori në rajon do të njohë një rritje prej 4.7%, ndërkohë që gjatë viteve të kaluara rritja vjetore mesatare ka qenë në 5.2%.

Numri total i lidhjeve të internetit me brez të gjerë në vendet e Europës Qendrore dhe Lindore fiksohet në 78.95 milionë. Gjatë pesë viteve të ardhshme ndërkohë, deri në 2022, rritja vjetore projektohet mesatarisht në 3.9%.

Aktualisht vlerësohet se vetëm 43.7% e familjeve në këto vende kanë një lidhje interneti me brez të gjerë, ndërkohë që në Europën Perëndimor e kjo normë vlerësohet në 72%. Pra, diferenca është e dukshme dhe sinjalizon gjithashtu një treg me një potencial edhe të madh rritje.

Sa i përket shpenzimeve nga vendet e rajonit në këtë sektor, ato prekën shifrën e 7.78 miliardë dollarëve përgjatë 2017-ës, në rritje me 3.7% në krahasim me vitin paraardhës. Gjatë 5 viteve të ardhshme rritja projektohet në vetëm 2%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.