Ukraina do të mbajë gjyqin e parë për krimet e luftës mbi pushtimin rus!

Prokurori i lartë i Ukrainës ka zbuluar planet për gjyqin e parë për krimet e luftës të një ushtari rus të kapur, pasi luftimet u ndezën në lindje dhe jug dhe Kremlini la të hapur mundësinë e aneksimit të një cepi të vendit që pushtoi në fillim të sulmit.

Prokurorja e Përgjithshme Iryna Venediktova tha se zyra e saj akuzoi Sgt. Vadin Shyshimarin, 21 vjeç, në vrasjen e një civili 62-vjeçar të paarmatosur, i cili u qëllua me armë teksa po ecte me biçikletë në shkurt, katër ditë pas luftës.

Shyshimarin, i cili shërbente me një njësi tankesh, u akuzua se qëlloi përmes një xhami të makinës mbi burrin në fshatin verilindor të Chupakhivka. Venediktova tha se ushtari mund të marrë deri në 15 vjet burg. Ajo nuk tha se kur do të fillonte gjyqi.

Zyra e Venediktova ka thënë se ka hetuar më shumë se 10,700 krime të dyshuara lufte të kryera nga forcat ruse dhe ka identifikuar mbi 600 të dyshuar.

Shumë nga mizoritë e supozuara dolën në dritë muajin e kaluar pasi forcat e Moskës ndërprenë përpjekjet e tyre për të kapur Kievin dhe u tërhoqën nga kryeqyteti, duke ekspozuar varre masive dhe rrugë dhe oborre të shpërndara me trupa në qytete si Bucha. Banorët treguan për vrasje, djegie, përdhunime, tortura dhe copëtime.

Volodymyr Yavorskyy i Qendrës për Liritë Civile tha se grupi ukrainas i të drejtave të njeriut do të ndjekë nga afër gjyqin e Shyshimarin për të parë nëse është i drejtë. “Është shumë e vështirë të respektohen të gjitha rregullat, normat dhe neutraliteti i proceseve gjyqësore në kohë lufte,” tha ai. Rusia mohon akuzat për krime lufte në vende si Bucha, duke e quajtur atë një “një provokim të rrezikshëm dhe serioz”. AP

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.